လံာ်နီၢ်ရူၤသး တၢ်ကတိၤဆှၢနုာ်

တၢ်ကတိၤဆှၢနုာ်

နီၢ်ရူၤသးအဂ့ၢ်လၢအအိၣ်ပှဲၤဒီးတၢ်မုာ်တၢ်ခုၣ်အံၤဘၣ်တၢ်ကျဲၤ လီၤပာ်လီၤအီၤလၢတၢ်ဆၢကတီၢ်ဖဲလံာ်ပှၤစံၣ်ညီၣ်ကွီၢ်လၢအပှဲၤ ဒီးတၢ်စုဆူၣ်ခီၣ်တကးအကတီၢ်အပူၤန့ၣ်လီၤ. နီၢ်ရူၤသးလၢအမ့ၢ်ပှၤမိၤအးမုၣ်တဂၤအံၤဆီဟံၣ်ဆီဃီဒီးပှၤအံၣ်စရ့လးဖိတဂၤန့ၣ်လီၤ. ဖဲအဝၤသံသဒၣ်အီၤန့ၣ်, နီၢ်ရူၤသးပာ်ဖျါထီၣ်အတၢ်သးတီလီၤလီၤဆီဆီလၢ အမံၤပှၢ်ပိာ်မုၣ်ဒီးဘျုးလီၤအသးယိာ်ယိာ်ဆူပှၤ အံၣ်စရ့လးဖိအယွၤအပူၤန့ၣ်လီၤ. လၢခံန့ၣ်, အဝဲထံၣ်န့ၢ်အဝၤအသီတဂၤလၢအမ့ၢ်အဝၤလၢညါတဂၤ အဘူးအတံၢ်န့ၣ်လီၤ. ခီဖျိတၢ်ဆီဟံၣ်ဆီဃီအံၤန့ၣ်, အဝဲကဲထီၣ်စီၤဒၤဝံးလၢအမ့ၢ်ပှၤအံၣ်စရ့လးဖိအစီၤပၤ အဒိၣ်ကတၢၢ်တဂၤအဖံဖးဒိၣ်န့ၣ်လီၤ.

လံာ်ပှၤစံၣ်ညီၣ်ကွီၢ်ပာ်ဖျါထီၣ်တၢ်ကီတၢ်ခဲတၢ်နးတၢ်ဖှီၣ်ဟဲ အိၣ်ထီၣ်ဖဲယွၤအပှၤဂီၢ်မုၢ်ဃၣ်ကွံာ်အသးလၢအီၤအကတီၢ်န့ၣ်လီၤ. လံာ်နီၢ်ရူၤသးပာ်ဖျါထီၣ်တၢ်ဆိၣ်ဂ့ၤဟဲအိၣ်ထီၣ်လၢပှၤတခီဘီ မုၢ်ဖိတဂၤအဂီၢ်, လၢအဃၣ်သးဆူအံၣ်စရ့လးအယွၤအအိၣ်, ဒီးလၢတၢ်အံၤအဃိ, ကဲထီၣ်တၢ်ဂ့ၢ်လၢအဘၣ်ထွဲဒီးအပှၤကလုာ်လၢ အတီဒီးအီၤတဖၣ်န့ၣ်လီၤ.

လံာ်အတကွီၣ်

နီၢ်နၤဧမံက့ၤကဒါက့ၤဆူဝ့ၢ်ဘ့ၤသလ့ဃ့ၣ်ဃုာ်ဒီးနီၢ်ရူၤသး ၁:၁-၂၂

နီၢ်ရူၤသးထံၣ်လိာ်သးဒီးစီၤဘိၤဧး ၂:၁-၃:၁၈

စီၤဘိၤဧးဆီဟံၣ်ဆီဃီဒီးနီၢ်ရူၤသး ၄:၁-၂၂

လံာ်နီၢ်ရူၤသး 1

စီၤအလံၤမ့လ့းဒီးအပှၤဟံၣ်ဖိဃီဖိ သုးအသးဆူကီၢ်မိၤအး

1မုၢ်နံၤမုၢ်သီလၢပှၤစံၣ်ညီၣ်ကွီၢ်တဖၣ်ပၢအံၣ်စရ့လးအကတီၢ် န့ၣ်, တၢ်သၣ်ဝံၤလီၤဒိအိၣ်ထီၣ်ဝဲဒၣ်လၢထံကီၢ်အပူၤန့ၣ်လီၤ. 2လၢတၢ်အံၤအဃိပှၤအိၣ်ဝဲတဂၤလၢဝ့ၢ်ဘ့ၤသလ့ဃ့ၣ်လၢကီၢ်ယူဒၤ အပူၤန့ၣ်, လဲၤဆူကီၢ်မိၤအးဃုာ်ဒီးအမါဒီးအဖိခွါခံဂၤဒ်သိးအကလဲၤ အိၣ်ဝဲတစိၢ်တလီၢ်အဂီၢ်န့ၣ်လီၤ. ပှၤတဂၤအံၤအမံၤမ့ၢ်ဝဲစီၤအလံၤမ့လ့း, အမါအမံၤမ့ၢ်နီၢ်နၤဧမံ, ဒီးအဖိခွါခံဂၤန့ၣ်, မ့ၢ်စီၤမၤဃလိၣ်ဒီးစီၤကံးလယိၣ်န့ၣ်လီၤ. အဝဲသ့ၣ်တဖၣ်န့ၣ်ဘၣ်ဃးဒီးပှၤအ့ဖရးသးဖိအဒူၣ်အထၢလီၤ. 3ဖဲအဝဲသ့ၣ်အိၣ်ဝဲလၢကီၢ်မိၤအးအဖၢမုၢ်, စီၤအလံၤမ့လ့းသံ ဝဲ, ဒီးနီၢ်နၤဧမံဘၣ်အိၣ်လီၤတဲာ်ဒီးအဖိခွါခံဂၤန့ၣ်လီၤ. 4အဝဲသ့ၣ်ဟံးန့ၢ်အမါလၢပှၤမိၤအးမုၣ်, တဂၤန့ၣ်အမံၤလၢနီၢ် ဧိးရပၤဒီးအဂၤတဂၤမ့ၢ်နီၢ်ရူၤသးလီၤ. ဖဲအဝဲသ့ၣ်အိၣ်ဝဲဖဲန့ၣ်အနံၣ်တဆံဝံၤအလီၢ်ခံန့ၣ်, 5စီၤမၤဃလိၣ်ဒီးစီၤကံးလယိၣ်သံဝဲ, ဒီးနီၢ်နၤဧမံဘၣ်အိၣ် လီၤတဲာ်ထဲတဂၤဧိၤ, လၢအဖိခွါခံဂၤဒီးအဝၤတအိၣ်လၢၤ ဘၣ်အလီၢ်ခံန့ၣ်လီၤ.

နီၢ်နၤဧမံဒီးနီၢ်ရူၤသးက့ၤကဒါက့ၤဆူဝ့ၢ်ဘ့ၤသလ့ဃ့ၣ်.

6ဖဲအအိၣ်ဒံးဝဲဖဲကီၢ်မိၤအးအပူၤန့ၣ်, နီၢ်နၤဧမံနၢ်ဟူဝဲ လၢယွၤဆိၣ်ဂ့ၤအပှၤဂီၢ်မုၢ်ဒီးဟ့ၣ်အဝဲသ့ၣ်လၢတၢ်အီၣ်တၢ်အီအ ဃိ, ကတဲာ်ကတီၤအသးဒ်သိးကဟးထီၣ်ကွံာ်လၢကီၢ်မိၤအး အပူၤဃုာ်ဒီးအဒဲၣ်တဖၣ်န့ၣ်လီၤ. 7ဒီးဟးထီၣ်သကိးဝဲဒီးက့ၤကဒါက့ၤဆူကီၢ်ယူဒၤန့ၣ်လီၤ. 8ဘၣ်ဆၣ်ဖဲအလဲၤတၢ်အဖၢမုၢ်, နီၢ်နၤဧမံစံးဘၣ်အဒဲၣ်ခံဂၤ, “က့ၤကဒါက့ၤသုဝဲတဂၤဆူသုမိၢ်ဒၣ်ဝဲအဟံၣ်တက့ၢ်. မ်ယွၤမၤတၢ်ဂ့ၤလၢသုဖီခိၣ်, ဒ်သုမၤဂ့ၤတ့ၢ်, ပှၤလၢအသံတဖၣ်ဒီးယၤအသိးန့ၣ်တက့ၢ်. 9မ်ယွၤမၤစၢၤသုလၢသုကဆီဟံၣ်ဆီဃီကဒီးတဘျီဒီးထံၣ်န့ၢ် တၢ်မုာ်တၢ်ခုၣ်န့ၣ်တက့ၢ်.”

ဒီးနၢမူအဝဲသ့ၣ်လၢတၢ်လီၤဖးအတၢ်နၢမူလီၤ. ဘၣ်ဆၣ်အဝဲသ့ၣ်ဟီၣ်ဝဲလၢအကလုၢ်ဖးဒိၣ်န့ၣ်လီၤ. 10ဒီးစံးဘၣ်အီၤ, “တမ့ၢ်ဘၣ်, ပကက့ၤဒီးနၤဆူနပှၤကလုာ်အ အိၣ်လီၤ.”

11ဘၣ်ဆၣ်နီၢ်နၤဧမံစံးဆၢဝဲ, “ယဖိမုၣ်သ့ၣ်ဧၢ, သုကဘၣ်က့ၤကဒါက့ၤလီၤ. ဘၣ်မနုၤလၢသုအဲၣ်ဒိးဟဲသကိးဒီးယၤ လဲၣ်. မ့ၢ်သုဆိကမိၣ်လၢယကအိၣ်ဒံးဒီးယဖိခွါတဖၣ်လၢသုကဆီ ဟံၣ်ဆီဃီအဂီၢ်န့ၣ်ဧါ. 12က့ၤကဒါက့ၤ, ယဖိမုၣ်သ့ၣ်ဧၢ, ယသးပှၢ်ကဲၣ်ဆိးလၢယက န့ၢ်ကဒီးယဝၤတဘျီအဂီၢ်လီၤ. ယမ့ၢ်စံးလၢယအိၣ်ဒံးဒီးတၢ်မုၢ်လၢ်, ဒီးထံၣ်န့ၢ်ဝၤတနၤအံၤဒီးဆံးစၢ်န့ၢ်ဖိခွါတဖၣ်ဒၣ်လဲာ်, 13မ့ၢ်သုကအိၣ်ခိးတုၤအဒိၣ်ထီၣ်စ့ၢ်ကီးဧါ. မ့ၢ်သုကပၢၤသုသး လၢအဂီၢ်ဒီးတန့ၢ်ဝၤဘၣ်န့ၣ်ဧါ. ယဖိမုၣ်သ့ၣ်ဧၢ, တမ့ၢ်ဒ်န့ၣ်ဘၣ်. ယသးအုးဒိၣ်နီၢ်မးလၢသုဂီၢ်မ့ၢ်လၢယွၤဃၣ်အသးထီဒါယၤလံအဃိလီၤ.”

14အန့ၣ်ဒီးအဝဲသ့ၣ်ဟီၣ်ကဒီးဝဲလၢအကလုၢ်ဖးဒိၣ်လီၤ. ဒီးနီၢ်ဧိးရပၤနၢမူအမံၤပှၢ်ပိာ်မုၣ်ဝံၤဒီးက့ၤကဒါက့ၤဆူ အဟံၣ်န့ၣ်လီၤ. မ့မ့ၢ်နီၢ်ရူၤသးန့ၣ်အိၣ်စဲဘူးအသးဒီးအီၤလီၤ. 15ဒီးနီၢ်နၤဧမံစံးဘၣ်အီၤ, “နီၢ်ရူၤသးဧၢ, နခံနဲမုၣ်တဂၤက့ၤက ဒါက့ၤလံဆူအပှၤကလုာ်ဒီးအကစၢ်တဖၣ်အအိၣ်လံ. က့ၤပိာ်အခံဆူနဟံၣ်ဒၣ်နဲတက့ၢ်.”

16ဘၣ်ဆၣ်နီၢ်ရူၤသးစံးဆၢဝဲ, “တဘၣ်ဃ့ကညးယၤလၢယက လဲၤသဒၣ်နၤအဂီၢ်မ့ၢ်ဂ့ၤ, ယသုတပိာ်နခံအဂီၢ်မ့ၢ်ဂ့ၤန့ၣ်တ ဂ့ၤ. ဖဲနလဲၤတပူၤလၢ်လၢ်ယကလဲၤယဲ, ဖဲနအိၣ်တပူၤလၢ်လၢ် ယကအိၣ်ယဲ, နပှၤကလုာ်ကမ့ၢ်ဝဲဒၣ်ယပှၤကလုာ်, ဒီးနကစၢ်ယွၤကမ့ၢ်ဝဲယကစၢ်ယွၤန့ၣ်လီၤ. 17ဖဲနသံတပူၤလၢ်လၢ်ယကသံယဲ, ဒီးယကဘၣ်တၢ်ခူၣ်လီၤကွံာ်ယၤဖဲ န့ၣ်လီၤ. ယမ့ၢ်လဲၤသဒၣ်နၤ, မ့တမ့ၢ်ဘၣ်လၢတၢ်သံမၤလီၤဖးယၤဒီးနၤန့ၣ် မ်ယွၤအတၢ်စံၣ်ညီၣ်လီၤဘၣ်ယၤ, ဒီးအါန့ၢ်အန့ၣ်တက့ၢ်.”

18ဒီးဖဲနီၢ်နၤဧမံထံၣ်ဝဲလၢနီၢ်ရူၤသးပာ်လီၤအသးနီၢ်နီၢ်လၢ ကလဲၤတၢ်ဒီးအီၤန့ၣ်, အဝဲတကတိၤအါတၢ်လၢၤဘၣ်န့ၣ်လီၤ.

19အဝဲသ့ၣ်ခံဂၤလဲၤသကိးတၢ်တုၤအလဲၤတုၤဝ့ၢ်ဘ့ၤသလ့ဃ့ၣ်န့ၣ် လီၤ. ဖဲအလဲၤတုၤဝဲန့ၣ်, ပှၤဝ့ၢ်ဖိခဲလၢာ်အိၣ်ဒီးတၢ်သူၣ်ပိၢ်သးဝးန့ၣ်လီၤ. ဒီးပှၤပိာ်မုၣ်တဖၣ်စံးဝဲ, “အဝဲအံၤမ့ၢ်နီၢ်နၤဧမံန့ၣ်ဧါ.”

20အဝဲစံးဆၢဝဲ, “တဘၣ်ကိးယၤလၢနီၢ်နၤဧမံလၢအမ့ၢ်ပှၤလၢ အသူၣ်ဖှံသးညီတဂ့ၤ. ကိးယၤလၢနီၢ်မၤရၤလၢအမ့ၢ်ပှၤလၢအသူၣ်အုးသးအုး, မ့ၢ်လၢသ့တၢ်လၢာ်ကစၢ်ယွၤမၤဆါယၤနးနးကလဲာ်လံအဃိတက့ၢ်. 21ဖဲယဟးထီၣ်လၢတၢ်လီၢ်အံၤအခါတၢ်အိၣ်ပှဲၤဒီးယၤ, ဘၣ်ဆၣ်ယွၤဒုးဟဲက့ၤယၤလၢတၢ်အိၣ်ကလီန့ၣ်လီၤ. ဘၣ်မနုၤလၢသုကိးယၤလၢနီၢ်နၤဧမံ, ဖဲယွၤသ့တၢ်လၢာ်ကစၢ်မၤကိၢ်မၤဂီၤယၤ ဒီးဒုးတူၢ်ယၤတၢ်နးတၢ်ဖှီၣ်န့ၣ်လဲၣ်.”

22တၢ်အံၤမ့ၢ်နီၢ်နၤဧမံအတၢ်ဟဲက့ၤကဒါက့ၤလၢကီၢ်မိၤအး, ဃုာ်ဒီးအဒဲၣ်မုၣ်နီၢ်ရူၤသးလၢအမ့ၢ်ပှၤမိၤအးမုၣ်, ဒ်လဲၣ်န့ၣ်လီၤ. အဝဲသ့ၣ်ဟဲက့ၤတုၤလၢဝ့ၢ်ဘ့ၤသလ့ဃ့ၣ်ဖဲတၢ်ကူးသီဘုမုယီၤအကတီၢ်န့ၣ်လီၤ.

လံာ်နီၢ်ရူၤသး 2

နီၢ်ရူၤသးမၤတၢ်လၢစီၤဘိၤဧးအစံာ်ပျီပူၤ

1နီၢ်နၤဧမံအိၣ်ဒီးအဘူးအတံၢ်လၢအမံၤမ့ၢ်စီၤဘိၤဧး, ပှၤဘၣ်ထွဲဒီးအဝၤစီၤအလံၤမ့လ့းအဒူၣ်ဖိထၢဖိတဂၤန့ၣ်လီၤ. အဝဲမ့ၢ်ပှၤထူးပှၤတီၤလၢအအိၣ်ဒီးအစိအကမီၤန့ၣ်လီၤ. 2ပှၤမိၤအးမုၣ်ဖိနီၢ်ရူၤသးစံးဘၣ်နီၢ်နၤဧမံ, “ပျဲယလဲၤဆူစံာ်ပျီတဖၣ်အပူၤဒ်သိးယကထၢဖှိၣ်ဘုအစဲၤတဖၣ် လၢပှၤကူးဘုတဖၣ်ပာ်လီၤတဲာ်န့ၣ်တက့ၢ်. ယနာ်လၢယကထံၣ်န့ၢ်ပှၤတဂၤဂၤလၢအကပျဲ ယမၤတၢ်အံၤန့ၣ်လီၤ.”

ဒီးနီၢ်နၤဧမံစံးဆၢဝဲ, “ယဖိမုၣ်ဧၢ, လဲၤတက့ၢ်.”

3တုၤနုၤတစု, နီၢ်ရူၤသးလဲၤဆူစံာ်ပျီတဖၣ်အပူၤဒီးဟးဝဲ လၢပှၤကူးဘုတဖၣ်အလီၢ်ခံ, ဒီးထၢထီၣ်ဝဲဘုအစဲၤတဖၣ်လၢအဝဲ သ့ၣ်ပာ်လီၤတဲာ်န့ၣ်လီၤ. ဒီးတၢ်မၤအသးလၢအဝဲလဲၤဘၣ်ဆူ စီၤဘိၤဧးအစံာ်ပျီပူၤန့ၣ်လီၤ.

4တယံာ်ဘၣ်ဒီး, စီၤဘိၤဧးအနီၢ်ကစၢ်ဒၣ်ဝဲဟဲတုၤဝဲ, လၢဝ့ၢ်ဘ့ၤသလ့ဃ့ၣ်ဒီးကတိၤဆၢဂ့ၤဆၢဝါပှၤကူးဘုဖိတဖၣ် ဒီးစံးဝဲ, “မ်ယွၤအိၣ်ဒီးသုတက့ၢ်.”

ဒီးအဝဲသ့ၣ်စံးဆၢဝဲ, “မ်ယွၤဆိၣ်ဂ့ၤနၤတက့ၢ်.”

5ဒီးစီၤဘိၤဧးသံကွၢ်ပှၤကဲခိၣ်ကဲနၢ်လၢအခ့အပှၤ, ပှၤကူးဘုဖိတဖၣ်အကျါဒီးစံးဝဲ, “ပိာ်မုၣ်သးစၢ်တဂၤန့ၣ် မ့ၢ်မတၤတဂၤလဲၣ်.”

6ပှၤတဂၤန့ၣ်စံးဆၢအီၤ, “အဝဲမ့ၢ်ပှၤမိၤအးမုၣ်ဖိတဂၤလၢအဟဲက့ၤဒီး နီၢ်နၤဧမံလၢကီၢ်မိၤအးန့ၣ်လီၤ. 7အဝဲဃ့တၢ်လၢယၤဒ်သိးယကပျဲအထၢဖှိၣ်ဘုစဲၤလၢအအိၣ်လီၤတဲာ် လၢပှၤကူးဘုဖိတဖၣ်အလီၢ်ခံန့ၣ်လီၤ. မ့တမ့ၢ်ဘၣ်လၢအအိၣ်ဘှံးဝဲတစိၢ်ဖိလၢဒဲပူၤဘၣ်န့ၣ်ဒီးအဝဲ မၤတၢ်စးထီၣ်လၢမုၢ်ဂီၤလံၤလံၤတုၤခဲကနံၣ်အံၤလီၤ.”

8တုၤနုၤတစုစီၤဘိၤဧးစံးဘၣ်နီၢ်ရူၤသး, “ပိာ်မုၣ်သးစၢ်ဧၢ, ပျဲယဟ့ၣ်ကူၣ်နၤဒ်အံၤ, လဲၤထၢဖှိၣ်ဘုစဲၤလၢစံာ်ပျီအဂၤအပူၤန့ၣ်တဂ့ၤ. မ့မ့ၢ်မၤဒၣ်တၢ်ဒီးပိာ်မုၣ်ဖဲအံၤတဖၣ်န့ၣ်တက့ၢ်. 9ကွၢ်အဝဲသ့ၣ်လဲၤကူးဘုအလီၢ်ဒီးပိာ်အခံန့ၣ်တက့ၢ်. ယမၤလိာ်တ့ၢ်လံယခ့ယပှၤပိာ်ခွါတဖၣ်လၢအသုတမၤတံာ်တာ်နၤတဂ့ၤ န့ၣ်လီၤ. ဒီးဖဲတၢ်သူနသးလၢထံတဘျီလၢ်လၢ်န့ၣ်, လဲၤဒီးအီထံလၢသပၢၤလၢပှၤမၤတၢ်ဖိတဖၣ်ဒၢၣ်ပှဲၤတ့ၢ်န့ၣ်တက့ၢ်.”

10တုၤနုၤတစု, နီၢ်ရူၤသးထိၣ်လီၤပှီၤအသးဒီးကျးလီၤအမဲာ် ပၢၢ်တုၤလၢဟီၣ်ခိၣ်ဒီးစံးဘၣ်စီၤဘိၤဧး, “ဘၣ်မနုၤအဃိန သူၣ်အိၣ်သးအိၣ်ယၤလၢအမ့ၢ်ဒၣ် ပှၤတခီဘီမုၢ်ဖိအံၤန့ၣ်လဲၣ်.”

11ဒီးစီၤဘိၤဧးစံးဆၢဝဲဒၣ်, “ယနၢ်ဟူတ့ၢ်တၢ်ဂ့ၢ်လၢလၢပှဲၤပှဲၤဘၣ်ဃးနမၤဘၣ်နမံၤပှၢ်ပိာ်မုၣ် စးထီၣ်လၢနဝၤသံသဒၣ်နၤလံၤလံၤန့ၣ်လီၤ. ဒီးယသ့ၣ်ညါလၢနပာ်တ့ၢ်နမိၢ်နပၢ်, နထံနကီၢ်ဒီးဟဲဒ်လဲၣ်လၢနကအိၣ်ဆိးလၢပှၤတကလုာ်လၢနတ သ့ၣ်ညါတ့ၢ်အဂ့ၢ်နီတဘျီအကျါန့ၣ်လီၤ. 12မ်ယွၤဟ့ၣ်ဘျုးက့ၤနၤလၢတၢ်လၢနမၤတ့ၢ်တဖၣ်အဃိန့ၣ်တက့ၢ်. မ်အံၣ်စရ့လးအကစၢ်ယွၤလၢနဟဲဃုတၢ်အိၣ်သဒၢလၢအဒံးဆ့ဖီလာ် တဂၤန့ၣ်ဟ့ၣ်ဘျုးက့ၤနၤလၢလၢပှဲၤပှဲၤတက့ၢ်.”

13တုၤနုၤတစု, နီၢ်ရူၤသးစံးဆၢဝဲဒၣ်, “ယကစၢ်ဧၢ, နမ့ၢ်ပှၤလၢအမၤဘျုးမၤဖှိၣ်ယၤဒိၣ်မးလီၤ. အဂ့ၢ်ဒ်အံၤ, ယမ့တမ့ၢ်ဘၣ်ဒ်ပှၤဒ်သိးဒီးနကုၢ်ပိာ်မုၣ်အကျါတဂၤ ဘၣ်ဆၣ်နမၤသးမုာ်ယၤလၢနတၢ်ကတိၤတၢ်မုာ်မုာ်ခုၣ်ခုၣ် တဖၣ်န့ၣ်လီၤ.”

14ဒီးဖဲတၢ်အီၣ်အကတီၢ်န့ၣ်, စီၤဘိၤဧးစံးဘၣ်နီၢ်ရူၤသး, “ဟဲဒီးဟံးန့ၢ်ကိၣ်, ဒီးဘျၢလီၤလၢစပံးထံအဆံၣ်အပူၤန့ၣ် တက့ၢ်.” အန့ၣ်ဒီးနီၢ်ရူၤသးဆ့ၣ်နီၤဃုာ်ဒီးပှၤကူးဘုဖိတ ဖၣ်, ဒီးစီၤဘိၤဧးဟ့ၣ်ဃီၤဘုဝဲာ်ဆူအအိၣ်လီၤ. ဒီးအဝဲဒၣ်အီၣ်တၢ်, ဒီးဘျဲးအီၣ်, ဒီးအိၣ်ဘျဲၣ်ဒံးဝဲလီၤ. 15တုၤအဝဲဂဲၤထၢၣ်ဒီးလဲၤဝဲဒ်သိးအကထၢဖှိၣ်ဘုစဲၤတဖၣ်န့ၣ်, စီၤဘိၤဧးမၤလိာ်အခ့အပှၤတဖၣ်ဒီးစံးဝဲ, “ပျဲအထၢဖှိၣ်ဘု အစဲၤတဖၣ်လၢဘုကဒိၣ်အကျါဒၣ်လဲာ်ဒီးဒုၣ်ဒွဲၣ်အီၤတဂ့ၤ. 16ထုးထီၣ်န့ၢ်အီၤဘုစဲၤတနီၤလၢဘုအကဒိၣ်အပူၤ, ဒီးပာ်လီၤတဲာ်န့ၢ်အီၤလၢအကထၢဖှိၣ်ဝဲအဂီၢ်န့ၣ်တက့ၢ်. ဒူအလိၤဒီးတြီအီၤတဂ့ၤ.”

17ဒီးနီၢ်ရူၤသးထၢဖှိၣ်တၢ်လၢစံာ်ပျီပူၤတုၤမုၢ်ဟါလီၤ, ဒီးဖဲအတီၢ်လီၤဝဲဝံၤန့ၣ်အိၣ်ဝဲဘုမုယီၤနီၣ်ဃီၣ်သၢဖျၢၣ် ဃၣ်ဃၣ်လီၤ. 18အဝဲဟံးထီၣ်အဘုဒီးက့ၤစိာ်ဝဲဆူဝ့ၢ်ပူၤ, ဒီးဒုးနဲၣ်အမံၤပှၢ်ပိာ်မုၣ်လၢတၢ်လၢအထၢဖှိၣ်ဝဲအိၣ်ဆံးအါ ဆံးအါလဲၣ်န့ၣ်လီၤ. အဝဲဟဲက့ၤစိာ်ဒီးဟ့ၣ်စ့ၢ်ကီးအမံၤပှၢ်ပိာ်မုၣ်, တၢ်အီၣ်လၢအဝဲအီၣ်ဘျဲးအီၣ်ဒီးအိၣ်ဘျဲၣ်ဝဲန့ၣ်လီၤ. 19ဒီးနီၢ်နၤဧမံသံကွၢ်အီၤ, “တနံၤညါအံၤနလဲၤထၢဘုဖဲလဲၣ်. နလဲၤမၤတၢ်လၢမတၤအစံာ်ပျီပူၤလဲၣ်. မ်ယွၤဆိၣ်ဂ့ၤပှၤတဂၤလၢ အသူၣ်အိၣ်သးအိၣ်နၤန့ၣ်တက့ၢ်.”

ဒီးနီၢ်ရူၤသးစံးဘၣ်အမံၤပှၢ်ပိာ်မုၣ်လၢတနံၤညါအံၤအဝဲလဲၤ မၤတၢ်လၢပှၤတဂၤအမံၤမ့ၢ်စီၤဘိၤဧးအစံာ်ပျီပူၤန့ၣ်လီၤ.

20ဒီးနီၢ်နၤဧမံစံးဘၣ်အဒဲၣ်, “မ်ယွၤလၢအဟံးဃာ်အတၢ်အၢၣ်လီၤအီလီၤထီဘိ ဆူပှၤသံဒီးပှၤမူတဂၤန့ၣ်ဆိၣ်ဂ့ၤစီၤဘိၤဧးတက့ၢ်.” ဒီးစံးကဒီးဝဲ, “ပှၤအံၤမ့ၢ်ပဘူးပတံၢ်အကျါတဂၤ, ဒီးအိၣ်ဒီးအမူအဒါလၢကဘၣ်အံးထွဲကွၢ်ထွဲပှၤန့ၣ်လီၤ.”

21ဒီးနီၢ်ရူၤသးစံးဝဲဒၣ်, “အဝဲစံးဘၣ်စ့ၢ်ကီးယၤလၢယကဘၣ် ထၢဖှိၣ်ဘုလီၤတဲာ်ဃုာ်ဒီးအခ့အပှၤတဖၣ်တုၤကူးဘုဝံၤအက တီၢ်န့ၣ်လီၤ.”

22အန့ၣ်တစုနီၢ်နၤဧမံစံးဘၣ်အဒဲၣ်မုၣ်နီၢ်ရူၤသး, “ယဖိမုၣ်ဧၢ, နလဲၤထၢဖှိၣ်တၢ်ဃုာ်ဒီးစီၤဘိၤဧးအခ့အပှၤပိာ်မုၣ်တဖၣ်လၢအ စံာ်ပျီပူၤဂ့ၤဒိၣ်တက့ၢ်လီၤ. နမ့ၢ်လဲၤဆူပှၤဂၤအစံာ်ပျီပူၤ န့ၣ်ဒီး, နကဘၣ်တၢ်မၤတံာ်တာ်နၤလီၤ.” 23လၢတၢ်န့ၣ်အဃိ, နီၢ်ရူၤသးလဲၤမၤတၢ်ဃုာ်ဒီးအဝဲသ့ၣ်, ဒီးထၢဖှိၣ်ဘုစဲၤအိၣ်လီၤတဲာ်တဖၣ်တုၤဘုမုယီၤဒီးဘုကၠူၣ် ဘၣ်တၢ်ကူးအီၤဝံၤဝဲခဲလၢာ်တစုန့ၣ်လီၤ. ဒီးအဝဲအိၣ်ဆိးဒံးဝဲဒီးအမံၤပှၢ်ပိာ်မုၣ်န့ၣ်လီၤ.

လံာ်နီၢ်ရူၤသး 3

နီၢ်ရူၤသးထံၣ်န့ၢ်အဝၤ

1ဒီးနီၢ်နၤဧမံစံးဘၣ်နီၢ်ရူၤသး, “ယဖိမုၣ်ဧၢ, ယကဘၣ်ဃုန့ၢ်ဟံၣ်လၢနဂီၢ်ဒ်သိးတၢ်မုာ်ကအိၣ်ဒီးနၤအဂီၢ်လီၤ. 2သ့ၣ်နီၣ်ထီၣ်က့ၤစီၤဘိၤဧးလၢနလဲၤမၤတၢ်ဃုာ်ဒီးအပှၤမၤတၢ် ဖိပိာ်မုၣ်တဖၣ်န့ၣ်, မ့ၢ်ပဘူးပတံၢ်တဂၤန့ၣ်တက့ၢ်. ခဲကနံၣ်အံၤ, ဒိကနၣ်တၢ်တက့ၢ်. မုၢ်တဟါအံၤအဝဲကပ ညၢဘုမုယီၤလၢကြဲၢ်ပူၤန့ၣ်လီၤ. 3လၢတၢ်န့ၣ်အဃိ, သ့စီနသး, ဖှူနသးဒီးတၢ်နၢမူ, ဒီးကူသိးထီၣ်တၢ်ကူတၢ်သိးလၢအဂ့ၤကတၢၢ်န့ၣ်တက့ၢ်. ဒီးလဲၤလီၤဆူကြဲၢ်ပူၤဖဲအဝဲပညၢဘုအလီၢ်န့ၣ်တက့ၢ်. ဘၣ်ဆၣ်, ဒုးသ့ၣ်ညါနသးလၢအီၤတုၤအဝဲအီၣ်တၢ်ဒီးအီတၢ်ဝံၤအကတီၢ်န့ၣ်တဂ့ၤ. 4တုၤအမံလီၤန့ၣ်, ကွၢ်နီၣ်တၢ်လီၢ်ဖဲအမံလီၤတက့ၢ်. ဒီးဖဲအမံဘၣ်အသးလံန့ၣ်, လဲၤဒီးအိးထီၣ်တၢ်လၢအမၤဘၢအခီၣ် ဒီးမံလီၤလၢအခီၣ်ထံးန့ၣ်တက့ၢ်. ဒီးအဝဲကတဲဖျါထီၣ်နၤတၢ်လၢနကဘၣ်မၤအီၤဒ်လဲၣ်အဂ့ၢ်န့ၣ်လီၤ.”

5နီၢ်ရူၤသးစံးဆၢဝဲ, “ကယဲၢ်တၢ်လၢနစံးဘၣ်ယၤခဲလၢာ်န့ၣ်, ယကမၤယဲလီၤ.”

6မၤသးဒ်န့ၣ်ဒီး, နီၢ်ရူၤသးလဲၤလီၤဆူကြဲၢ်ပူၤဒီးမၤဝဲဒ် အမံၤပှၢ်ပိာ်မုၣ်စံးဘၣ်အီၤအသိးန့ၣ်လီၤ. 7ဖဲစီၤဘိၤဧးအီၣ်တၢ်ဒီးအီတၢ်ဝံၤဝဲန့ၣ်, အသူၣ်ဖှံအသးညီဝဲလီၤ. ဒီးလဲၤမံလီၤဝဲလၢဘုပူၣ်အကတၢၢ်န့ၣ်လီၤ. အန့ၣ်ဒီး, နီၢ်ရူၤသးဟဲဝဲကယီကယီ, အိးထီၣ်တၢ်လၢအမၤဘၢအခီၣ်ဒီးမံလီၤဝဲလီၤ. 8လၢဖးဖီမုၢ်အကတီၢ်, ဖဲအဖုးပၢၢ်ထီၣ်ဝဲဒီးဃၣ်အသးန့ၣ်, ကမၢကမၣ်ဝဲလၢအထံၣ်ဘၣ်ပိာ်မုၣ်တဂၤမံလီၤလၢအခီၣ်ထံးန့ၣ်လီၤ. 9ဒီးစံးဝဲဒၣ်, “နမ့ၢ်မတၤလဲၣ်.”

ပိာ်မုၣ်န့ၣ်စံးဆၢဝဲ, “ယမ့ၢ်နကုၢ်ပိာ်မုၣ်နီၢ်ရူၤသးလီၤ. ဒုးလုးစ့ၢ်ကီးယၤလၢ နယၣ်လုးတက့ၢ်. အဂ့ၢ်ဒ်အံၤ, နမ့ၢ်ပှၤလၢအဘူးအတံၢ်တဂၤ, ပှၤလၢအမူအဒါအိၣ်လၢကအံးထွဲကွၢ်ထွဲက့ၤယၤအဂီၢ်န့ၣ်လီၤ.”

10ဒီးအဝဲစံးဝဲ, “မ်ယွၤဆိၣ်ဂ့ၤနၤတက့ၢ်. နပာ်ဖျါထီၣ်ဟံၣ်ဖိ ဃီဖိအတၢ်သးတီလၢနမၤတၢ်အံၤအဂီၢ်န့ၣ်, ဒိၣ်န့ၢ်တၢ်လၢနမၤတ့ၢ်ဘၣ်နမံၤပှၢ်ပိာ်မုၣ် အဂီၢ်တက့ၢ်ဒၣ်လဲာ်လီၤ. နတဃုန့ၢ်ပိာ်ခွါသးစၢ်လၢအထူးအတီၤမ့ၢ်ဂ့ၤ, အဖှီၣ်မ့ၢ်ဂ့ၤန့ၣ်ဘၣ်. 11ခဲကနံၣ်အံၤနီၢ်ရူၤသးဧၢ, ဘၣ်ယိၣ်တၢ်တဂ့ၤ. ကယဲၢ်တၢ်လၢနစံးဘၣ်ယၤခဲလၢာ်န့ၣ်ယကမၤယဲလီၤ. အဂ့ၢ်ဒ်အံၤ, ပှၤဝ့ၢ်ဖိကိးဂၤသ့ၣ်ညါလၢနမ့ၢ်ပိာ်မုၣ်လၢအဂ့ၤအဝါတဂၤလီၤ. 12ယမ့ၢ်ပှၤလၢအဘူးအတံၢ်တဂၤနီၢ်နီၢ်လၢမူဒါအိၣ်ဝဲလၢနဂီၢ် လီၤ. ဘၣ်ဆၣ်ပှၤလၢအဘူးဒိၣ်န့ၢ်ယၤတက့ၢ်န့ၣ်, အိၣ်ဝဲတဂၤလီၤ. 13အိၣ်ဒၣ်ကလိာ်ဖဲအံၤသီတနၤကျၢၤ, ဒီးလၢမုၢ်ဆ့ၣ်ထီၣ်န့ၣ်, ပကဃုသ့ၣ်ညါတၢ်လၢမ့ၢ်ပှၤတဂၤန့ၣ်ကဟံးန့ၢ်မူဒါလၢနဂီၢ်ဧါ န့ၣ်လီၤ. မ့ၢ်မၤဒ်န့ၣ်ဒီးဂ့ၤလီၤ. မ့ၢ်တမၤဒ်န့ၣ်ဘၣ်ဒီး, ယအၢၣ်လီၤယသးလၢယွၤလၢအမူဝဲတဂၤအမဲာ်ညါလၢယက ဟံးန့ၢ်မူဒါလၢနဂီၢ်န့ၣ်လီၤ. ခဲအံၤ, မံလီၤတုၤမုၢ်ဆ့ၣ် ထီၣ်န့ၣ်တက့ၢ်.”

14လၢတၢ်န့ၣ်အဃိ, နီၢ်ရူၤသးမံလီၤဝဲလၢအခီၣ်ထံးတုၤမုၢ်ဆ့ၣ် ထီၣ်လီၤ. ဘၣ်ဆၣ်ဂဲၤဆၢထၢၣ်ဝဲတချူးလၢပှၤသ့ၣ်ညါလိာ်အသးသ့ဒံးဘၣ် အကတီၢ်န့ၣ်လီၤ. အဂ့ၢ်မ့ၢ်လၢစီၤဘိၤဧးတ အဲၣ်ဒိးဝဲလၢပှၤသ့ၣ်ညါဘၣ်ပိာ်မုၣ်တဂၤဟဲနုာ်လၢကြဲၢ်ပူၤ အဂ့ၢ်အဃိန့ၣ်လီၤ. 15ဒီးစီၤဘိၤဧးစံးဘၣ်အီၤ, “ဟဲစိာ်နဆ့ကၤဖီခိၣ်လၢနကၤ အီၤန့ၣ်ဒီးသလၣ်လီၤအီၤဖဲအံၤတက့ၢ်.” နီၢ်ရူၤသးမၤဝဲဒ်န့ၣ်အသိး, ဒီးအဝဲဃီၣ်ထီၣ်ဘုမုယီၤဃုနီၣ်ဃီၣ်, ဒီးပာ်လီၤဝဲလၢအလိၤလီၤ. အန့ၣ်ဝံၤဒီးနီၢ်ရူၤသးဟဲက့ၤဆူဝ့ၢ်ပူၤလီၤ. 16တုၤအဟဲက့ၤတုၤဆူဟံၣ်န့ၣ်, အမံၤပှၢ်ပိာ်မုၣ်သံကွၢ်အီၤဒီး စံး, “ယဖိမုၣ်ဧၢ, တၢ်မၤအသးဒီးနၤဒ်လဲၣ်.”

နီၢ်ရူၤသးစံးဘၣ်တဲဘၣ်အီၤကယဲၢ်တၢ်လၢစီၤဘိၤဧးမၤတၢ်လၢ အဂီၢ်ခဲလၢာ်န့ၣ်လီၤ. 17ဒီးစံးအါထီၣ်ဝဲ, “အဝဲစံးဘၣ်ယၤလၢယတဘၣ်က့ၤကလီဆူ နအိၣ်ဘၣ်အဃိ, ဟ့ၣ်လီၤစ့ၢ်ကီးယၤဘုမုယီၤဃုနီၣ်ဃီၣ်အံၤ န့ၣ်လီၤ.”

18နီၢ်နၤဧမံစံးဘၣ်အီၤ, “ယဖိမုၣ်ဧၢ, အိၣ်ခိးလၢတၢ်သးစူၤအ ပူၤ, တုၤနထံၣ်ဘၣ်တၢ်ခဲလၢာ်အံၤကမၤအသးဒ်လဲၣ်ဒ်လဲၣ်န့ၣ်တ က့ၢ်. စီၤဘိၤဧးတအိၣ်ဘှံးဝဲတုၤအမၤဝံၤတၢ်တမံၤအံၤလၢမုၢ်မဆါတနံၤအံၤန့ၣ်ဘၣ်လီၤ.”

လံာ်နီၢ်ရူၤသး 4

စီၤဘိၤဧးဆီဟံၣ်ဆီဃီဒီးနီၢ်ရူၤသး

1စီၤဘိၤဧးလဲၤဆူတၢ်အိၣ်ဖှိၣ်ရိဖှိၣ်အလီၢ်ဖဲဝ့ၢ်အပဲတရီ, ဒီးဆ့ၣ်နီၤဝဲဖဲန့ၣ်လီၤ. တုၤနုၤတစု, တုၤစီၤအလံၤမ့လ့း အဘူးအတံၢ်နီၢ်နီၢ်, လၢစီၤဘိၤဧးစံးကတိၤတ့ၢ်ဝဲလၢအဂ့ၢ်တဂၤ, ဟဲဝဲန့ၣ်ဒီး, စီၤဘိၤဧးကိးအီၤဒီးစံးဘၣ်အီၤ, “ယတံၤသကိးဧၢ, ဟဲဆ့ၣ်နီၤဖဲအံၤတက့ၢ်.” ဒီးဟဲဆ့ၣ်နီၤဝဲဒၣ်န့ၣ်လီၤ. 2အန့ၣ်ဝံၤဒီး, စီၤဘိၤဧးကိးန့ၢ်ဝ့ၢ်အခိၣ်အနၢ်ဆံဆဲၣ်ဂၤဒီး ဃ့ကညးအဝဲသ့ၣ်လၢကဆ့ၣ်နီၤစ့ၢ်ကီးဖဲန့ၣ်လီၤ. တုၤအဝဲသ့ၣ်ဆ့ၣ်နီၤလံန့ၣ်ဒီး, 3စီၤဘိၤဧးစံးဘၣ်အဘူးအတံၢ်တဂၤန့ၣ်, “ခဲကနံၣ်အံၤ, နီၢ်နၤဧမံလၢအဟဲက့ၤတ့ၢ်လံလၢကီၢ်မိၤဧးန့ၣ်အဲၣ်ဒိးဆါ လီၤကွံာ်ဟီၣ်ခိၣ်တကဝီၤလၢအမ့ၢ်ပဘူးပတံၢ်စီၤအလံၤမ့လ့းအ တၢ်န့ၣ်လီၤ. 4ဒီးယဆိကမိၣ်လၢနကြၢးသ့ၣ်ညါတၢ်ဂ့ၢ်အံၤလီၤ. ခဲကနံၣ်အံၤနမ့ၢ်သးလီတၢ်လီၢ်အံၤန့ၣ်ဒီး, ပှ့ၤအီၤလၢပှၤလၢအဆ့ၣ်နီၤဖဲအံၤတဖၣ်အမဲာ်ညါန့ၣ်တက့ၢ်. နမ့ၢ်တသးလီဘၣ်န့ၣ်ဒီးစံးဘၣ်ယၤတက့ၢ်. အဂ့ၢ်ဒ်အံၤ, နမ့ၢ်ပှၤလၢအကြၢးဒိးန့ၢ်ဘၣ်တၢ်အဆိကတၢၢ်တဂၤ, ဒီးယဲယမ့ၢ်ဒၣ်ပှၤခံဂၤတဂၤန့ၣ်လီၤ.”

ဒီးပှၤတဂၤန့ၣ်စံး, “ယကပှ့ၤက့ၤအီၤလီၤ.”

5အန့ၣ်ဒီးစီၤဘိၤဧးစံး, “မုၢ်တနံၤလၢနပှ့ၤဟီၣ်ခိၣ်တကဝီၤ လၢနီၢ်နၤဧမံအစုပူၤန့ၣ်, နမၤန့ၢ်စ့ၢ်ကီးပှၤမိၤဧးမုၣ်ကမဲနီၢ်ရူၤသး, ဒ်သိးနကဒုးအိၣ်ထီၣ်က့ၤတၢ်န့ၢ်သါလၢပှၤသံတဂၤအဒူၣ်ဖိ ထၢဖိအဂီၢ်န့ၣ်လီၤ.”

6ပှၤတဂၤန့ၣ်စံးဆၢဝဲ, “မ့မ့ၢ်ဒ်န့ၣ်ဒီး, ယတပှ့ၤက့ၤအီၤလၢယ ဂီၢ်ဒၣ်ယဲဘၣ်. ယဖိယလံၤဒၣ်ယဲတမ့ၢ်ကန့ၢ်သါဘၣ်အီၤဘၣ်. ဟံးန့ၢ်ယလီၢ်လၢနဂီၢ်ဒၣ်နဲဒီးပှ့ၤက့ၤအီၤတက့ၢ်. ယတပှ့ၤက့ၤအီၤလၢၤဘၣ်.”

7ပှၤအံၣ်စရ့လးဖိအလုၢ်အလၢ်လၢအမၤညီနုၢ်ဝဲဖဲအကမၤဂၢၢ်မၤ ကျၢၤတၢ်ဆါတၢ်ပှ့ၤအဂီၢ်မ့ၢ်ဂ့ၤ, တၢ်ခီလဲလိာ်တၢ်စု လီၢ်ခီၣ်ခိၣ်အဂီၢ်မ့ၢ်ဂ့ၤန့ၣ်, မ့ၢ်ပှၤဆါတၢ်တဂၤဘ့ၣ်လီၤအခီၣ် ဖံးတခီဒီးဟ့ၣ်လီၤဝဲဆူပှၤပှ့ၤတၢ်တဂၤအစုပူၤန့ၣ်လီၤ. တၢ်မၤဒ်သိးအံၤန့ၣ်, ဒုးနဲၣ်ဖျါထီၣ်တၢ်ပာ်ဂၢၢ်ပာ်ကျၢၤလံ တၢ်ဂ့ၢ်န့ၣ်လီၤ.

8လၢတၢ်အံၤအဃိဖဲပှၤတဂၤန့ၣ်စံးဘၣ်စီၤဘိၤဧး, “ပှ့ၤတၢ်အံၤလၢနဂီၢ်ဒၣ်နဲတက့ၢ်” န့ၣ်ဒီး, အဝဲဘ့ၣ်လီၤကွံာ်ခီၣ်ဖံးတခီန့ၣ်လီၤ. 9အန့ၣ်ဝံၤဒီးစီၤဘိၤဧးတဲဘၣ်ပှၤအခိၣ်အနၢ်တဖၣ်ဒီးပှၤအဂၤလၢ အအိၣ်ဖဲန့ၣ်ခဲလၢာ်ဒီးစံးဝဲ, “သုမ့ၢ်ပှၤအုၣ်အသးတဖၣ်လၢမုၢ်တနံၤအံၤလၢယမ့ၢ်တ့ၢ်လံပှၤ ပှ့ၤက့ၤကယဲၢ်တၢ်ဘၣ်ဃးဒီးစီၤအလံၤမ့လ့း, စီၤကံးလယိၣ်ဒီးစီၤမၤဃလိၣ်လၢနီၢ်နၤဧမံအစုပူၤန့ၣ်လီၤ. 10ဒီးယမၤန့ၢ်စ့ၢ်ကီးလံပှၤမိၤအးမုၣ်ဖိနီၢ်ရူၤသးလၢအမ့ၢ် စီၤမၤဃလိၣ်အမုၣ်ကမဲတဂၤလၢအကကဲထီၣ်ယမါ, ဒ်သိးယကဒုးအိၣ်ထီၣ်က့ၤ တၢ်န့ၢ်သါလၢပှၤသံတဂၤအဒူၣ်ဖိထၢဖိအဂီၢ်န့ၣ်လီၤ. ဒီးအစၢၤအသွဲၣ်ကအိၣ်ဒံးဝဲဆူညါလၢအပှၤကလုာ်အကျါဒီးလၢ အဝ့ၢ်ဒၣ်ဝဲအပူၤန့ၣ်လီၤ. သုမ့ၢ်ပှၤအုၣ်အသးတဖၣ်လၢမုၢ်တနံၤအံၤန့ၣ်လီၤ.”

11တုၤနုၤတစု, ပှၤအခိၣ်အနၢ်တဖၣ်ဒီးပှၤအဂၤလၢအအိၣ်ဖဲ ဝ့ၢ်အပဲတရီခဲလၢာ်န့ၣ်စံးဝဲ, “ပမ့ၢ်ပှၤအုၣ်အသးတဖၣ်လီၤ. မ်ယွၤဒုးကဲထီၣ်ပိာ်မုၣ်လၢအကဟဲနုာ်လၢနဟံၣ်ပူၤတဂၤအံၤဒ် သိးအကလီၤဂာ်ဒီးနီၢ်ရၤဃ့လးဒီးနီၢ်လ့အၤခံဂၤလၢအဆံးစၢ် န့ၢ်ဖိလံၤအါဂၤလၢစီၤယၤကိာ်အဂီၢ်န့ၣ်တက့ၢ်. မ်နကဘီၣ်ထီၣ်ညီထီၣ်လၢအ့ဖရးသးအဒူၣ်အထၢပူၤဒီးနမံၤဟူ ထီၣ်သါလီၤလၢဝ့ၢ်ဘ့ၤသလ့ဃ့ၣ်အပူၤန့ၣ်တက့ၢ်. 12မ်နဖိနလံၤလၢယွၤကဟ့ၣ်သါနၤခီဖျိပိာ်မုၣ်အံၤန့ၣ်, ဒုးကဲထီၣ်နဒူၣ်ဖိထၢဖိလီၤဂာ်ဒ်စီၤဖ့ရ့းလၢအမ့ၢ်စီၤယူ ဒၤဒီးနီၢ်တၤမၢ်အဒူၣ်ဖိထၢဖိအသိးန့ၣ်တက့ၢ်.”

စီၤဘိၤဧးဒီးအစၢၤအသွဲၣ်တဖၣ်.

13မၤသးဒ်န့ၣ်ဒီး, စီၤဘိၤဧးဆီဟံၣ်ဆီဃီဒီးနီၢ်ရူၤသးန့ၣ် လီၤ. ယွၤဆိၣ်ဂ့ၤနီၢ်ရူၤသးဒီးအဝဲဒၣ်ဒၢထီၣ်ဝဲ, ဒီးဆံးစၢ်န့ၢ်ဖိခွါတဂၤလီၤ. 14ပှၤပိာ်မုၣ်တဖၣ်စံးဘၣ်နီၢ်နၤဧမံ, “စံးထီၣ်ပတြၢၤယွၤတ က့ၢ်. အဝဲဟ့ၣ်လံနၤလၢနလံၤပိာ်ခွါတဂၤလၢမုၢ်မဆါတနံၤအံၤဒ်သိး အကအံးထွဲကွၢ်ထွဲနၤအဂီၢ်န့ၣ်လီၤ. မ်ဖိသၣ်ပိာ်ခွါအံၤအမံၤဟူ ထီၣ်သါလီၤလၢပှၤအံၣ်စရ့လးဖိတဖၣ်အကျါန့ၣ်တက့ၢ်. 15နဒဲၣ်မုၣ်အဲၣ်နၤဒီးမၤတ့ၢ်လံတၢ်လၢနဂီၢ်အါန့ၢ်ဒံးဖိခွါ နွံဂၤန့ၣ်လီၤ. ဒီးခဲအံၤအဝဲဟ့ၣ်လံနၤနလံၤခွါတဂၤလၢ အကဟဲစိာ်န့ၢ်နၤတၢ်အိၣ်မူအသီဒီးဟ့ၣ်နၤတၢ်ဘံၣ်တၢ်ဘၢ နသးပှၢ်အကတီၢ်န့ၣ်လီၤ.” 16အန့ၣ်ဒီးနီၢ်နၤဧမံစိာ်ထီၣ်ဖိသၣ်, ဒီးဖိးဟုဃာ်အီၤလၢအသး နါပှၢ်, ဒီးအံးထွဲကွၢ်ထွဲအီၤန့ၣ်လီၤ.

17ဒီးပိာ်မုၣ်လၢအခိၣ်အဃၢၤတဖၣ်ယုၢ်န့ၢ်ဖိသၣ်အမံၤလၢစီၤဧိၤဘ့းလီၤ. ဒီးစံးဝဲ, “ဖိခွါတဂၤအိၣ်ဖျဲၣ်ထီၣ်လၢနီၢ်နၤဧမံအဂီၢ်လံ.” ဒီးလၢခံန့ၣ်စီၤဧိၤဘ့းကဲထီၣ်စီၤယံးၡဲအပၢ်, စီၤယံးၡဲကဲထီၣ်စီၤဒၤဝံးအပၢ်လီၤ.

18ဒီးအအံၤမ့ၢ်စီၤဖ့ရ့းအစၢၤအသွဲၣ်တဖၣ်လီၤ.

19စီၤဖ့ရ့းထီၣ်ဖိစီၤဃ့ၤစရိၣ်, စီၤဃ့ၤစရိၣ်ထီၣ်ဖိစီၤရၣ်, ဒီးစီၤရၣ်ထီၣ်ဖိစီၤဧးမံၤနဒး, 20စီၤဧးမံၤနဒးထီၣ်ဖိစီၤနးၡိၣ်, ဒီးစီၤနးၡိၣ်ထီၣ်ဖိစီၤစၤလမိၣ်, 21စီၤစၤလမိၣ်ထီၣ်ဖိစီၤဘိၤဧး, ဒီးစီၤဘိၤဧးထီၣ်ဖိစီၤဧိၤဘ့း, 22စီၤဧိၤဘ့းထီၣ်ဖိစီၤယံးၡဲ, ဒီးစီၤယံးၡဲထီၣ်ဖိစီၤဒၤဝံးလီၤ.