လါဃိး ၂၀၂၅

အါဘျီန့ၣ်တၢ်ကူၣ်ဘၣ်ကူၣ်သ့န့ၣ်ပဆိကမိၣ်ကမၣ်အီၤဒီးကၠိမ့တမ့ၢ်ပၠၣ်ဆိၤမိၣ်(ဒ်အမ့ၢ် college, university)တဖၣ်န့ၣ်လီၤ. ဘၣ်ဆၣ်တၢ်ကူၣ်ဘၣ်ကူၣ်သ့န့ၣ်မ့ၢ်ကျဲတဖၣ်လၢအအိၣ်ဒီးတၢ်သိၣ်လိသီလိဒီးတၢ်မၤလိတၢ်လၢကၠိမ့ၢ်ဂ့ၤမ့တမ့ၢ်တၢ်လီၢ်တခါခါလၢတၢ်မၤလိတၢ်ဒီးသိၣ်လိတၢ်အလီၢ်န့ၣ်လီၤ. တၢ်ကူၣ်ဘၣ်ကူၣ်သ့န့ၣ်သိၣ်လိပှၤလၢပကသ့ၣ်ညါပလုၢ်ပလၢ်ထူသနူ,တၢ်သကဲးပ၀း,ဒီးဒုနဲၣ်ပှၤလၢပမူပဒါလၢပပှၤတ၀ၢအပူၤန့ၣ်လီၤ. 

တၢ်ကူၣ်ဘၣ်ကူၣ်သ့ဟ့ၣ်ပှၤတၢ်သ့ၣ်ညါ,တၢ်သ့တၢ်ဘၣ်,ဒီးတၢ်ကူၣ်တၢ်ဖးတဖၣ်ဒ်သိးပကသုးပတၢ်အိၣ်မူဆူညါအဂီၢ်န့ၣ်လီၤ.

တၢ်ကူၣ်ဘၣ်ကူၣ်သ့န့ၣ်တအိၣ်ဒီးအဆၢကတီၢ်ဒ်အမ့ၢ်နဖျိထီၣ်ကၠိမ့တမ့ၢ်နမၤ၀ံၤကၠိၤန့ၣ်ဘၣ်. တၢ်ကူၣ်ဘၣ်ကူၣ်သ့န့ၣ်မ့ၢ်၀ဲပတၢ်လဲၤအကျဲတခါလၢပကဘၣ်လဲၤအီၤထီဘိတုၤလၢပတၢ်အိၣ်မူတစိၤန့ၣ်လီၤ. 

တၢ်ကူၣ်ဘၣ်ကူၣ်သ့န့ၣ်ဆးထီၣ်အသးလၢပနီၢ်ဆံးခါ,ပမိမ့တမ့ၢ်ပပါသိၣ်လိပှၤလၢတၢ်လၢဂ့ၤဒီးတၢ်လၢအတဂ့ၤဘၣ်,တၢ်လၢပကြၢးမၤဒီးတၢ်လၢပတကြၢးမၤတဖၣ်န့ၣ်လီၤ. ဖဲပနီၢ်ဆံးအခါန့ၣ်တၢ်ကူၣ်ဘၣ်ကူၣ်သ့လၢပဒိးန့ၢ်လၢပမိဒီးပပါအအိၣ်န့ၣ်ဟ့ၣ်ပှၤတၢ်ဆိကမိၣ်,တၢ်လၢပအဲၣ်ဒိးသံကွၢ်လၢပနၢ်တပၢၣ်တဖၣ်,ဒီးတၢ်လၢပအဲၣ်ဒိးဘှါဆဲလီၤတဖၣ်န့ၣ်လီၤ. အဟ့ၣ်ဂံၢ်ဟ့ၣ်ဘါပှၤလၢပကသံကွၢ်တၢ်,ဃုထံၣ်န့ၢ်တၢ်အသီတဖၣ်,ဒီးနၢ်ပၢၢ်တၢ်လၢအအိၣ်လၢပဃၢၤတဖၣ်န့ၣ်လီၤ.

ဒ်သိးနကအိၣ်ဒီးတၢ်ကူၣ်သ့ၣ်န့ၣ်နကဘၣ်မ့ၢ်ပှၤလၢအအိၣ်ဒီးတၢ်သ့ၣ်ညါန့ၣ်လီၤ. ဒီးတၢ်သ့ၣ်ညါန့ၣ်နမၤန့ၢ်အီၤလၢကၠိ,နတံၤသကိး,နသရၣ်မုၣ်/ခွါ,နမိနပါ,ဒီးပှၤအဂၤတဖၣ်လၢနပှၤတ၀ၢအပူၤန့ၣ်လီၤ. 

တၢ်ကူၣ်သ့န့ၣ်မ့ၢ်တၢ်သ့ၣ်ညါပခိၣ်ပဃၢၤ,ပတၢ်အိၣ်သး,ဒီးနၢ်ပှၤပှၤဂၤအတၢ်အိၣ်သးဒီးနီၤဖးလီၤအီၤလၢအလီၢ်စုာ်စုာ်ဒီးဒုးအိၣ်ထီၣ်တၢ်ဆၢတဲာ်လၢတၢ်သ့ၣ်ညါတဖၣ်အံၤအဖီခိၣ်န့ၣ်လီၤ. 

လၢခံကတၢၢ်န့ၣ်,တၢ်ကူၣ်ဘၣ်ကူၣ်သ့န့ၣ်ရ့ဒိၣ်၀ဲလၢပနီၢ်ကစၢၢ်အတၢ်ဒိၣ်ထီၣ်,မၤဒိၣ်မၤထီထီၣ်ပပှၤတ၀ၢ,ဒီးပတၢ်ဆၢတဲာ်တဖၣ်လၢပတၢ်အိၣ်မူအပူၤန့ၣ်လီၤ.